धनगढीः कैलालीको अत्तरियामा सुनचाँदी व्यापार गर्दै आएका विकास सुनारमाथि गत आइतबार दिनदाहडै गोली प्रहार भयो। उनको ३५ तोला सुन लुटियो। मोटरसाइकलमा आएको दुई जना लुटेराको समूह अझै फरार छ। अत्तरिया गोली काण्डको एक हप्ता हुँदा पनि लुटेरा समूह पक्राउ परेको छैन।
बुधबार राति अत्तरियाकै साना किसान कृषि सहकारीमा चोरी भयो। गोदावरी नगरपालिका वडा नम्बर २ मा रहेको सहकारी संस्थाको लकर तोडेर ५ लाख ६८ हजार ६ सय तीन रुपैयाँसहित सिसीभिटी क्यामराको डिभाइससमेत चोरले लगेर गए। उक्त घटनामा संलग्नहरु पनि पक्राउ परेका छन्। अत्तरिया क्षेत्रमा चोरी तथा लुटपाटका घटना बढेका बेला इलाका प्रहरी कार्यालय मालाखेतीका प्रमुख, प्रहरी नायव उपरिक्षक रवीन्द्रराज पाण्डे भने बिदामा छन्। गत मंसिर २८ गतेदेखि उनी घर बिदामा काठमाण्डौ गएका हुन्। मालाखेती प्रहरीको निमित्त प्रमुखको जिम्मेवारीमा प्रहरी निरिक्षक बासुदेव भट्ट छन्। उनी अत्तरिया क्षेत्रमा हुने औपचारिक कार्यक्रममा व्यस्त हुन्छन्। भट्टले दिनेशखबरसँग भने, ‘सोम–मंगलबारसम्म डिएसपी साप आउनुहुन्छ। सहयोगका लागि जिल्लाबाट आउने गर्नु भएको छ। एसपी साप पनि आउनु हुन्थ्यो। डिएसपी साप पनि आउनु भयो। प्रदेशको आरआईटीको समूह पनि लागेकै छ। पक्राउ गरेका छैनौ। तर सबै कोणबाट अनुसन्धान गरिरहेका छौ।’धनगढी उप–महानगरपालिका वडा नम्बर ९ मा गत सोमबार राति गोली चल्यो। शिवरामनगर टोलका प्रजापति विष्टको घरमा चोरी गर्न आएका समूहको प्रतिकार गर्न खोज्दा डाँकाहरुले उनी माथि गोली चलाए। विष्टलाई गोली प्रहार गर्ने पनि पक्राउ परेका छैनन्। जिल्लामा डाँकाको समूहले गोली प्रहार गर्दा सुरक्षा चुनौती बढेको कैलाली प्रहरीले बताएको छ। जिल्ला प्रहरी कार्यालय कैलालीका निमित्त प्रमुख, प्रहरी नायव उपरिक्षक वेदप्रकाश जोशीले चोरी, डकैतीका घटनाका कारण सुरक्षा चुनौती बढेको बताएका हुन्। ‘अत्तरियाको केसपछि फाट–फुट घटना भएका छन्। सुरक्षा चुनौती बढेको देखिएको छ। हामीले सुरक्षा योजना बनाएका छौ। सबै क्षेत्रमा गस्ती बढाएका छौ। सबै क्षेत्रमा सुरक्षा प्रमुखहरुलाई भनेका छौ। अत्तरिया क्षेत्रमा नयाँ चेक प्वाइन्टसमेत थपेका छौ। चोरीका घटना अझै हुँदैछन्। हाम्रो पहल जारी छ। सिसी क्यामेरा बिग्रीएकाले पनि हामीलाई समस्या भएको छ,’ उनले भने।
जिल्लामा सुरक्षाचुनौ बढेका बेला जिल्ला प्रहरी कार्यालय कैलाली भने नेतृत्व विहीन छ। जिल्ला प्रहरी कार्यालय कैलालीका प्रमुख शोमेन्द्रसिँह राठोरको सरुवा भयो। उनको ठाउँमा देवेन्द्रबहादुर पाललाई पठाइएको छ। उनी जिल्लामा हाजिर भएका छैनन्। चोरी, लुटपाट, डकैती तथा तस्करीका घटनाले जिल्लाको सुरक्षा व्यवस्था बिग्रदै गएका बेला जिल्ला प्रहरी निमत्तको भरमा छ। जिल्ला प्रहरी नेतृत्व विहीन भएका बेला जिल्लाको इलाका प्रहरी मालाखेतीका प्रमुख डिएसपी पाण्डेसँगै इलाका प्रहरी कार्यालय फलटुडेका प्रमुख, प्रहरी निरिक्षक धर्मसिँह विष्ट घर बिदामा छन्। पुस ३ गतेदेखि विष्ट बिदामा गएका हुन्। इलाका प्रहरी कार्यालय सडकपुर बौनियाका प्रमुख प्रहरी निरिक्षक महेशविक्रम शाही पनि घर बिदामा छन्। शाही घर बिदामा धनगढी आएका हुन्। इलाका प्रहरी कार्यालय सुखडका प्रमुख प्रहरी नायव उपरिक्षक लक्ष्मणबहादुर शाही भने घर बिदाबाट फर्किएका छन्। उनले सुखड क्षेत्रमा चोरीका घटनामा कमी आएको दाबी गरेका छन्। धनगढी उप–महानगरपालिका वडा नम्बर १९ फूलबारीस्थित सुर्मा साईपाल ऋण तथा बचत सहकारीमा मंगलबार राति चोरी भयो। सहकारीको सटरको ताल्चा तोडेर अज्ञात समूहले एक लाख ९७ हजार ६ सय ४८ रकम चोरी गरेको हो। बिहीबार राति मात्र कैलालीका २ स्थानमा चोरी भयो। धनगढीको मुख्य बजारको चौधरी बुक डिपो नजिकै रहेको राजकुमार शर्माको चिया पसल र गौरीगंगा नगरपालिका वडा नम्बर ८ का जनकराज जोशीको घरमा चोरी भएको हो। जिल्लामा चोरी, लुटपाट तथा डकैतीका घटना बढेपछि नागरिक त्रसित बनेको छन्। यस विषयप्रति स्थानी प्रशासन भने बेखबर जस्तै बनेको छ।
प्रतिक्रिया