सुदूरपश्चिम नेपाली समाज इजरायलले पहिलो पटक ऐतिहासिक अबलोकन भ्रमणको सेप्टेम्बर १९/२० मा आयोजना गर्ने भएको छ।

इजरायलको उत्तरतर्फ अवस्थित रमणीय पर्यटकीय क्षेत्र काफर ब्लुम भ्रमणका लागि समाजले विशेष कार्यक्रम तय गरेको समाजका श्रदय अध्यक्ष कृष्ण बहादुर चौधरीले बताउनुभयो। यस अबलोकन भ्रमणमा इजरायल बासी पूर्व इलामदेखि पश्चिम कंचनपुर सम्मका देश भरीका साथीहरूलाई समेट्दै, नेपालका विविध भू-भाग र संस्कृतिको एकताको सन्देश इजरायलमै फैलाउने उद्देश्य राखिएको अध्यक्ष चौधरीले बताउनु भयो।

यस अवसरमा सुदूरपश्चिमको मौलिक भाषा, कला र सांस्कृतिक पहिचानलाई झल्काउने प्रस्तुति विशेष आकर्षण हुने समाजका संरक्षक रमेश जोशीले जनाएका छन। देउडा, हुड्केउली, थारु समुदायको झुम्रा नृत्य, बैठकु लगायतका परम्परागत नृत्य र गायन प्रस्तुत गरिने साथै, सुदूरपश्चिमेली संस्कारलाई उजागर गर्ने पारिवारिक रमाइलो, परम्परागत पहिरन र साङ्गीतिक झलकले कार्यक्रमलाई थप आकर्षक बनाउने तयारी गरिएको जोशीले बताउनु भएको छ।

कार्यक्रममा सहभागीहरूले आफ्नै हातले तयार पारिएका सुदूरपश्चिमेली परिकार—ढिँडो, गेडागुडीका परिकार, मासुका परिकार र थारु समुदायका विशेष खानेकुरा—चाख्न पाउनेछन्। यसबाट इजरायलवासी नेपाली समुदायलाई नयाँ स्वाद मात्र नभई घर-गाउँको सम्झनासहित आत्मीयता अनुभव हुने अपेक्षा गरिएको समाजका महासचिब बिनोद कुमार ठगुन्नाले बताउनु भएको छ।

सुदूरपश्चिम नेपाली समाज इजरायलका नेपाल संयोजक तथा प्रवक्ता अनिता शाहका अनुसार, “यस भ्रमणले सुदूरपश्चिमेली मात्र नभई सम्पूर्ण नेपाली समुदायलाई एकताको सूत्रमा बाँध्नेछ। हाम्रो कला, संस्कृति र परम्परा विदेशमै उजागर गर्न पाउनु हाम्रो गौरव हो।”

समाजले गरेको यो प्रयासले सुदूरपश्चिम क्षेत्रको गौरवशाली इतिहास, संस्कार र पहिचानलाई अन्तर्राष्ट्रिय स्तरमा परिचित गराउँदै, इजरायलमा रहेका नेपालीबीच आत्मीय सम्बन्ध र ऐक्यबद्धता थप प्रगाढ बनाउने विश्वास गरिएको छ।