डोटी– आईसीसी यू–१९ महिला टी–२० विश्वकप आज (शनिबार) देखि मलेसियामा सुरु हुँदै छ । प्रतियोगिताको पहिलो दिन ६ खेल हुँदैछन् ।

यस फर्म्याटको विश्वकपमा पहिलो पटक ऐतिहासिक सहभागिता जनाइरहेको नेपालको महिला यू–१९ टोलीले बङ्गलादेश यु-१९ टोलीको सामना गर्दै आज प्रतियोगिताको सुरूवात गर्दैछ ।

खेल नेपाली समय अनुसार शनिबार दिउँसो १२:१५ बजे सुरु हुनेछ । नेपाली महिला टोलीले कुनै पनि समूहमा पहिलो पटक विश्व कप खेल्न लागेको हो । सन् २००७ बाट महिला क्रिकेट सुरुवात गरेको नेपालको यो ग्लोबल इभेन्टमा पहिलो सहभागिता हो ।

गत वर्षको नोभेम्बरमा युएईमा विश्व कपका लागि एसियाली छनोट भएको थियो । छनोट प्रतियोगितामा नेपाल सहित ४ देशको सहभागिता रहेको थियो । प्रतियोगिता डबल राउन्ड रोबिन लिगका आधारमा भएको थियो । तालिकाको शीर्ष स्थानमा रहँदै नेपाल विश्व कपका लागि छनोट भएको थियो ।

पहिलो खेलमा युएईसँग पराजित नेपालले अन्तिम खेलमा युएईलाई पराजित गर्दै विश्व कपमा स्थान बनाएको थियो ।

विश्व कपमा छनोटसँगै पहिलो पटक आयोजना हुन लागेको यु १९ महिला एसिया कपमा समेत नेपालले सहभागी हुने अवसर पाएको थियो।

मलेसिया प्रस्थान गर्नु अघि आयोजित बिदाइ कार्यक्रममा नेपाली टोलीकी कप्तान तथा मुख्य प्रशिक्षकले नेपाली टोलीको पहिलो लक्ष्य दोस्रो चरण रहेको बताएका थिए। कप्तान पुजा महतो तथा मुख्य प्रशिक्षक महेश रिजालले टोलीको पहिलो लक्ष्य सुपर सिक्स रहेको बताएका थिए ।

आइसिसी यु-१९ महिला विश्व कपमा १६ राष्ट्रको सहभागिता छ । सहभागी टोलीहरू लाई ४ समूहमा विभाजन गरिएको छ । समूह ‘ए’ मा साविक विजेता भारत, श्रीलंका, आयोजक मलेसिया र वेस्ट इण्डिज छन् ।

समूह ‘बी’ मा इङ्ग्ल्याण्ड, आयरल्याण्ड, पाकिस्तान र अमेरिका तथा समूह ‘सि’ मा न्युजिल्याण्ड, समोआ, दक्षिण अफ्रिका र नाइजेरिया छन् । समूह ‘डी’ मा नेपाल सहित स्कटल्यान्ड, बंगलादेश र अस्ट्रेलिया छन् ।

प्रत्येक समूहका शीर्ष ३ टोली सुपर सिक्समा प्रवेश गर्ने छन् । सुपर सिक्समा समान ६ देशको दुई समूह हुनेछ ।

ग्रुप १ मा समूह ‘ए’ र समूह ‘डी’ का शीर्ष ३ देश रहनेछ । त्यस्तै, ग्रुप २ मा समूह ‘बी’ र समूह ‘सी’ का शीर्ष ३ राष्ट्र रहने छन् । सुपर सिक्समा स्थान बनाएमा नेपालले भारत, श्रीलंका तथा वेस्ट इण्डिजसँग खेल्न पाउने सम्भावना रहन्छ।

सुपर सिक्सका दुवै ग्रुपका शीर्ष २ टोली सेमिफाइनल पुग्नेछन् । पहिलो संस्करणको आइसिसी यु १९ महिला टि ट्वान्टी विश्व कप सन् २०२३ मा दक्षिण अफ्रिकामा आयोजना भएको थियो ।

पहिलो संस्करणको फाइनलमा इङ्ग्ल्याण्डलाई ७ विकेटले हराउँदै भारत च्याम्पियन भएको थियो ।

 

नेपाली महिला यु १९ टिमको समूह चरणको खेलतालिका :-

पहिलो खेल – जनवरी १८ (माघ ५ गते) बंगलादेशसँग

दोस्रो खेल – जनवरी २० (माघ ७ गते) स्कटल्यान्डसँग

तेस्रो खेल – जनवरी २२ (माघ ९ गते) अस्ट्रेलियासँग

 

समूह चरणका तीनै खेल नेपाली समयअनुसार दिउँसो १२:१५ मा सुरु हुनेछ ।

 

नेपाली यु-१९ राष्ट्रिय महिला टोली :-

पूजा महतो (कप्तान), सोनी पाख्रिन, किरन कुमारी कुवँर, कृष्मा गुरुङ, साना प्रविन, स्नेहा महरा, सावित्रा धामी, तृषना बिक, रिया शर्मा, अलिशा कुमारी यादव, कुसुम गोदार, सिमाना केसी, ज्योत्सिका मरासिनी, रचना चौधरी र अनु कडायत।