सरकारको सिफारिसमा राष्ट्रपतिबाट राष्ट्रिय सभा सदस्य मनोनीत भएकी अञ्जान शाक्यले शिक्षा मन्त्रालयप्रति आफ्नो रूचि र विज्ञता दुवै नभएको बताएकी छन्।

शिक्षा मन्त्रीबाट सोमबार विद्या भट्टराईले राजीनामा दिएपछि नयाँ शिक्षा मन्त्रीमा शाक्यको नाम चर्चा हुँदै आएको छ। नेकपा (एमाले) कै कतिपय पदाधिकारीले शाक्य अब शिक्षा मन्त्री हुने चर्चा गरेका थिए।

सोही आधारमा पूर्वराजदूतसमेत रहेकी शाक्य शिक्षा मन्त्री हुने खबरहरू आएका थिए।

यसप्रति शाक्यले खण्डन गरेकी छन्।

‘केही सञ्चारमाध्ययममा म स्वयंलाई समेत जानकारी नभएको, रुची नभएको र मेरो विज्ञता पनि नभएको मन्त्रालयसँग जोडेर अन्जान शाक्य शिक्षामन्त्री बन्दै भन्ने खालका भ्रामक र कपोलकल्पित समाचार प्रकाशन भएको जानकारी प्राप्त भयो। यो विषयमा मैले नबोल्दा वा कुनै प्रतिक्रिया नदिँदा पनि हुने हो। तर मेरा शुभचिन्तक, मसँग सरोकार राख्ने र आफन्तहरूमा समेत यही भ्रामक र कपोलकल्पित प्रचारका कारण भ्रम सिर्जना होला भनी सामान्य केही जानकारी गराउने प्रयास गरेको छु,’ सामाजिक सञ्जाल फेसबुकमा उनले लेखेकी छन्, ‘तपाईंहरूलाई जानकारी नै छ म भर्खरै मात्र अन्तर–व्यवस्थापिका सङ्घ (आइपीयु) को दिगो विकास स्थायी समितिमा एसिया–प्रशान्त क्षेत्रबाट निर्वाचित भएर आएको छु । यसले केही हदसम्म भए पनि नेपालको इज्जत र प्रतिष्ठा अन्तराष्ट्रियस्तरसम्म लैजान र उच्चो बनाउन केही भूमिका खेलेको होला भन्ने विश्वास मैले लिएको छु।’

उनी यसअघि इसराइलका लागि नेपाली राजदूत थिइन्। शाक्य नेकपा (एमाले) का अध्यक्ष केपी शर्मा ओलीनिकट मानिन्छिन्। साथै शाक्यले अहिले राष्ट्रिय सभाको विज्ञ सदस्यको हैसियतले आफू ऐन कानुन बनाउन सक्रिय भूमिकामा रहेको पनि बताएकी छन्।

‘त्यसैले अहिले तुरून्तै मन्त्री भएर अहिलेका यी आफ्ना कर्तव्यबाट विमुख हुनुहुन्न भन्नेमा म प्रतिबद्ध छु,’ उनले भनिन्, ‘मलाई जानकारी भएअनुसार केही मानिसले मप्रति पूर्वाग्रह राखेरनै अहिलेको शिक्षा क्षेत्रमा देखिएका समस्यामा मुछ्ने प्रयास गरेको होला भन्ने ठानेको छु। मेराविरुद्ध भएका यस्ता मिथ्या प्रचारबाजीलाई सही ठानेर पूर्वाग्रही र कपोलकल्पित प्रचार–प्रसार नगरिदिनु हुन् सम्पूर्ण सञ्चारमाध्ययहरुलाई अनुरोध पनि गर्न चाहन्छु।’